સુરેન્દ્રનગર જિલ્લા ભરવાડ સમાજનું પ્રથમ સ્નેહમિલન સંપન્ન: શિક્ષણ અને એકતા પર ભાર..

સુરેન્દ્રનગર Surendranagar : નૂતન વર્ષના મંગળ પર્વ નિમિત્તે સુરેન્દ્રનગર જિલ્લા સમસ્ત ભરવાડ સમાજના પ્રથમ સ્નેહમિલન સમારોહનું આયોજન તાજેતરમાં ગોપાલક શૈક્ષણિક સંકુલ, બાકરથળી-સુરેન્દ્રનગર ખાતે કરવામાં આવ્યું હતું. સમાજમાં એકતા, શિક્ષણ અને સર્વાંગી વિકાસના સંદેશ સાથે યોજાયેલા આ કાર્યક્રમમાં સંકુલના હોદ્દેદારો, ટ્રસ્ટીઓ, આગેવાનો, કર્મચારીઓ અને મોટી સંખ્યામાં યુવાનો ઉત્સાહભેર ઉપસ્થિત રહ્યા હતા.

એકતાનો સંદેશ અને સામાજિક વિકાસ પર ભાર

વક્તાઓએ ઉપસ્થિત સૌને નવા વર્ષની હાર્દિક શુભેચ્છાઓ પાઠવી હતી અને સમાજના વિકાસ માટે એકતાની તાતી જરૂરિયાત ઉપર ભાર મૂક્યો હતો. તેમણે સ્પષ્ટપણે જણાવ્યું હતું કે સામાજિક, શૈક્ષણિક અને સર્વાંગી પ્રગતિ માટે રાજકીય મતભેદો અને વ્યક્તિગત ગમા-અણગમાને ભૂલીને સમસ્ત સમાજે એક મંચ પર આવવું અનિવાર્ય છે. સમાજનું સંગઠન જ વિકાસનો પાયો છે, અને આ સ્નેહમિલન સમારોહ તે દિશામાં પ્રથમ પગલું બની રહ્યો.

હીરાભાઈ મીર 'ભામાશા'નું શિક્ષણ માટે અનુદાન

આ સમારોહનું મુખ્ય આકર્ષણ થાનગઢ પંથકમાં 'ભામાશા' તરીકે જાણીતા અગ્રણી આગેવાન હીરાભાઈ નાથાભાઈ મીરની મોટી જાહેરાત રહી. તેમણે ગોપાલક શૈક્ષણિક સંકુલમાં રહીને અભ્યાસ કરતા ભરવાડ સમાજના વિદ્યાર્થીઓના શૈક્ષણિક વિકાસ માટે દર વર્ષે રૂપિયા અઢી લાખનું દાન આજીવન આપવાની ઘોષણા કરી. શિક્ષણના ક્ષેત્રે સમાજને પ્રેરક બળ પૂરું પાડતી આ જાહેરાતને ઉપસ્થિત સૌએ તાળીઓના ગડગડાટથી વધાવી લીધી હતી. હીરાભાઈ ભામાશાની આ નવી પહેલથી યુવાનોને શિક્ષણ દ્વારા પ્રગતિના માર્ગે આગળ વધવાની પ્રેરણા મળશે અને સમાજમાં શિક્ષણ પ્રત્યેની જાગૃતિનું સ્તર ઊંચું આવે તેવો આશાવાદ વ્યક્ત કરવામાં આવ્યો છે.

દાતાઓ અને સમાજસેવકોનું સન્માન

આ પ્રસંગે સમાજના વિકાસમાં યોગદાન આપનાર દાતાઓ અને શિક્ષા ક્ષેત્રે નામના મેળવનાર કર્મચારીઓનું સન્માન કરવામાં આવ્યું હતું. હીરાભાઈ ભામાશા સહિત અન્ય દાતાઓ સર્વ કરશનભાઈ અલગોતર, અર્જુનભાઈ ડાંગર, ગોપાલભાઈ મુંધવા, કરશનભાઈ સભાડ અને વિજયભાઈ ભરવાડનું સંકુલના પ્રમુખ બાબાભાઈ ભરવાડ અને અન્ય આગેવાનો દ્વારા સન્માન કરીને આભાર વ્યક્ત કરવામાં આવ્યો હતો.

આ ઉપરાંત, સમાજમાં શિક્ષણ સાથે સંકળાયેલા અને સંગઠનમાં યોગદાન આપનાર કર્મચારીઓનું પણ વિશેષ સન્માન કરાયું હતું. જેમાં સુરેન્દ્રનગર જિલ્લા પ્રાથમિક શિક્ષક સંઘના જિલ્લા કારોબારી સભ્ય તરીકે ચૂંટાયેલા જગદીશભાઈ મીર અને વિરમભાઈ ડાંગર, પ્રાથમિક શિક્ષક સંઘ, સુરેન્દ્રનગર શહેર ઘટકના ઉપપ્રમુખ હરિભાઈ ચાવડા અને લીંબડી તાલુકા શિક્ષક સહકારી મંડળીના પ્રમુખ વેલાભાઈ સાટીયાનું ગૌરવભેર સન્માન કરવામાં આવ્યું હતું. આ સન્માને સમાજમાં શિક્ષણના મહત્ત્વને વધુ ઉજાગર કર્યું હતું.

સમગ્ર કાર્યક્રમનું સુંદર અને પ્રેરક સંચાલન વેલાભાઈ સાટીયાએ કર્યું હતું અને અંતે લાલજીભાઈ ખાટરીયાએ ઉપસ્થિત સૌનો આભાર વ્યક્ત કર્યો હતો. આ સ્નેહમિલન સમારોહ ભરવાડ સમાજમાં એકતા, શિક્ષણ અને સમૃદ્ધિની નવી દિશા કંડારનારો બની રહ્યો છે.