સુરેન્દ્રનગર: જિલ્લામાં સુરક્ષા વ્યવસ્થાને વધુ સુદૃઢ બનાવવાના ભાગરૂપે સુરેન્દ્રનગર પોલીસ દ્વારા વિવિધ આકરાં પગલાં લેવામાં આવી રહ્યા છે. આ અભિયાન અંતર્ગત થાન પોલીસ સ્ટેશન દ્વારા નાઈટ પેટ્રોલિંગને સઘન બનાવવામાં આવ્યું છે, જે હવે શહેરના વિવિધ વિસ્તારોમાં નિયમિતપણે જોવા મળી રહ્યું છે.
થાન પોલીસ સ્ટેશનના પીઆઈ ટી.બી. હિરાણી અને સ્ટાફની સક્રિયતા હેઠળ આ નાઈટ પેટ્રોલિંગ દરમિયાન શહેરના મુખ્ય માર્ગો અને અંદરના વિસ્તારોમાં સઘન ચેકિંગ કાર્યવાહી હાથ ધરવામાં આવી હતી. સુરક્ષાની ચકાસણીની સાથે સાથે, પોલીસ દ્વારા ટ્રાફિકના નિયમોનું પાલન ન કરતા વાહન ચાલકો સામે ખાસ ઝુંબેશ ચલાવવામાં આવી હતી.
ખાસ કરીને, યુવાનોમાં લોકપ્રિય બુલેટ મોટરસાયકલો અને અન્ય ટુ-વ્હીલર ચાલકોને ટાર્ગેટ કરવામાં આવ્યા હતા, જેઓ અવારનવાર ટ્રાફિક નિયમોની અવગણના કરતા હોય છે. પોલીસે ફૂટ પેટ્રોલિંગ દ્વારા આવા નિયમ ભંગ કરનારાઓને ઝડપી પાડ્યા હતા. ટ્રિપલ સવારી કરવી, કે પછી લાયસન્સ વગર વાહન ચલાવવા, ધ્વનિ પ્રદૂષણ ફેલાવતા હોર્ન અને સાઇલેન્સર જેવા અનેક નિયમ ભંગ બદલ કડક કાયદાકીય કાર્યવાહી કરવામાં આવી હતી.
પોલીસની આ અચાનક અને કડક કાર્યવાહીના પગલે વાહનચાલકોમાં નિયમ પાલન પ્રત્યે ગંભીરતા વધી છે. પીઆઈ હિરાણીએ જણાવ્યું હતું કે, આ પ્રકારની કાર્યવાહી નિયમિતપણે ચાલુ રહેશે, જેનો મુખ્ય ઉદ્દેશ્ય નાગરિકોની સુરક્ષા સુનિશ્ચિત કરવા અને કાયદો તથા વ્યવસ્થા જાળવવાનો છે.
થાન પોલીસ દ્વારા સુરક્ષા અને ટ્રાફિક નિયમન માટે લેવાયેલા આ સકારાત્મક પગલાંને સ્થાનિક લોકોએ વ્યાપક આવકાર આપ્યો છે. શહેરીજનોએ પોલીસની આ કામગીરીને બિરદાવી છે અને આશા વ્યક્ત કરી છે કે, આનાથી ટ્રાફિક વ્યવસ્થામાં સુધારો થશે અને રાત્રિના સમયે સુરક્ષાનું વાતાવરણ વધુ મજબૂત બનશે.
0 Comments