સુરેન્દ્રનગરમાં શિક્ષણ સંસ્થાઓ દ્વારા તુલસી પૂજન અને નાતાલની અનોખી ઉજવણી: ભારતીય સંસ્કૃતિ અને પશ્ચિમી ઉત્સવનો સમન્વય

સુરેન્દ્રનગર : સુરેન્દ્રનગર એજ્યુકેશન સોસાયટી સંચાલિત શ્રી મણિલાલ કોઠારી બાલ મંદિર તથા શ્રી કિરચંદભાઈ કોઠારી મિડલ સ્કૂલ ખાતે 'તુલસી પૂજન' અને 'નાતાલ' (ક્રિસમસ) ના તહેવારોની હર્ષોલ્લાસ સાથે ઉજવણી કરવામાં આવી હતી. શાળા પરિવાર દ્વારા આયોજિત આ કાર્યક્રમમાં પરંપરાગત મૂલ્યો અને આધુનિક ઉત્સવનો સુંદર સમન્વય જોવા મળ્યો હતો.

કાર્યક્રમની શરૂઆતમાં શાળાના આચાર્ય ઉર્મિલાબેન બી. અમદાવાદીયા દ્વારા વિધિવત તુલસી પૂજન કરવામાં આવ્યું હતું. તેમણે વિદ્યાર્થીઓને સંબોધતા જણાવ્યું હતું કે, "તુલસી માત્ર એક છોડ નથી, પણ તે ભારતીય સંસ્કૃતિનું પ્રતિક છે." તેમણે તુલસીના ઔષધીય ગુણો અને તેના આધ્યાત્મિક તેમજ વૈજ્ઞાનિક મહત્વ વિશે ઊંડાણપૂર્વક સમજ આપી બાળકોમાં પર્યાવરણ અને સ્વાસ્થ્ય પ્રત્યે જાગૃતિ કેળવી હતી.

નાતાલના પર્વ નિમિત્તે શાળાના પ્રાંગણમાં અનેરો ઉત્સાહ જોવા મળ્યો હતો. નાના ભૂલકાઓએ મનમોહક 'ક્રિસમસ ડાન્સ' રજૂ કરી સૌના દિલ જીતી લીધા હતા. તેમજ ધોરણ-૬ ના વિદ્યાર્થીએ પ્રભુ ઈશુ ખ્રિસ્તની વેશભૂષા ધારણ કરી જીવંત અભિનય રજૂ કર્યો હતો. ધોરણ-૬ અને ૭ ના વિદ્યાર્થીઓએ ક્રિસમસના લોકપ્રિય ગીતો પર સુંદર નૃત્યો રજૂ કર્યા હતા. આ ઉપરાંત ધોરણ-૮ ના વિદ્યાર્થીઓએ ગુજરાતી અને અંગ્રેજી ભાષામાં નાતાલના પર્વનો ઈતિહાસ અને તેનું મહત્વ સમજાવતા પ્રભાવશાળી વક્તવ્યો આપ્યા હતા.

કાર્યક્રમના અંતે આચાર્યશ્રીએ તમામ બાળકોને નાતાલની શુભેચ્છાઓ પાઠવી હતી. તેમણે ઈશુ ખ્રિસ્તના પ્રેમ અને શાંતિના સંદેશને જીવનમાં ઉતારવા પ્રેરણા આપી હતી. વિશેષરૂપે, ઉજવણીના ભાગરૂપે બાળકોને વૃક્ષારોપણ કરવા અને પ્રકૃતિની જાળવણી કરવા માટે કટિબદ્ધ કર્યા હતા.

આ સમગ્ર કાર્યક્રમને સફળ બનાવવામાં શાળાના સમગ્ર સ્ટાફ મિત્રોએ ભારે જહેમત ઉઠાવી હતી. આ કાર્યક્રમ દ્વારા બાળકોમાં સર્વધર્મ સમભાવ અને પર્યાવરણ પ્રેમના સંસ્કારોનું સિંચન થયું હતું.