શ્રી કીરચંદભાઈ કોઠારી મિડલ સ્કૂલના વિદ્યાર્થીઓએ જુનિયર ટાઇટન્સ સિઝન-3 માં ઉત્સાહભેર ભાગ લીધો

સુરેન્દ્રનગર : એજ્યુકેશન સોસાયટી સંચાલિત શ્રી કીરચંદભાઈ કોઠારી મિડલ સ્કૂલના વિદ્યાર્થીઓએ Gujarat Titans દ્વારા આયોજિત "જુનિયર ટાઇટન્સ સિઝન-3" સ્પોર્ટ્સ ઇવેન્ટમાં ઉત્સાહભેર ભાગ લીધો હતો. 

આ રમતોનું આયોજન સુરેન્દ્રનગર સ્થિત કેમ્બ્રિજ સ્કૂલ ઓફ એક્સેલન્સના વિશાળ ગ્રાઉન્ડ પર કરવામાં આવ્યું હતું. વિદ્યાર્થીઓએ ક્રિકેટ, વોલીબોલ અને ફૂટબૉલ જેવી લોકપ્રિય રમતોમાં ભાગ લઈ સ્પોર્ટ્સમેનશિપના ભાવ સાથે પોતાની પ્રતિભા દર્શાવી. સમગ્ર કાર્યક્રમ ઓલમ્પિક જેવી ઉજવણીના માહોલમાં યોજાયો હતો, જેમાં વિદ્યાર્થીઓએ રમતગમતની સાથે સાથે ટીમ વર્ક, શિસ્ત અને સ્પર્ધાત્મક ભાવનાનું મહત્વ પણ અનુભવું.

વિદ્યાર્થીઓને સુરક્ષિત રીતે કાર્યક્રમ સ્થળે લઈ જવા માટે મહાનગરપાલિકા સી.ટી. બસ વિભાગનો સહયોગ મળ્યો હતો. શાળાના વડાઓની મંજૂરી બાદ આ યાત્રાનું આયોજન કરવામાં આવ્યું હતું, જેમાં તમામ વ્યવસ્થાઓ ખૂબ જ સુવ્યવસ્થિત રીતે કરવામાં આવી.

શાળાના શિક્ષકો વિશ્વરાજભાઈ જાડેજા અને સરફરાજભાઈ મન્સૂરીએ વિદ્યાર્થીઓને તૈયાર કરવા માટે વિશેષ મહેનત કરી હતી. શાળા સમય બાદ પણ તેઓએ વિદ્યાર્થીઓને તાલીમ આપી અને તેમને સ્પર્ધામાં ઉત્સાહપૂર્વક ભાગ લેવા માટે પ્રોત્સાહિત કર્યા હતા. 

વિદ્યાર્થીઓના ઉત્સાહ અને ભાગીદારીને ધ્યાને લઈ શાળાના આચાર્ય ઉર્મિલાબેન અમદાવાદિયા તથા સમગ્ર શિક્ષકવર્ગે તમામ ભાગ લેનાર વિદ્યાર્થીઓને શુભેચ્છાઓ પાઠવી હતી. 

આ કાર્યક્રમ વિદ્યાર્થીઓ માટે માત્ર રમતગમત પૂરતો જ નહીં, પણ જીવનના મહત્વપૂર્ણ પાઠ શીખવાનો એક અનોખો અવસર સાબિત થયો. આવા કાર્યક્રમો દ્વારા વિદ્યાર્થીઓમાં આત્મવિશ્વાસ, નેતૃત્વ ક્ષમતા અને શારીરિક તંદુરસ્તી જેવા ગુણો વિકસે છે, જે તેમના સર્વાંગી વિકાસ માટે અત્યંત જરૂરી છે.