વિશ્વ એડ્સ દિવસ: સુરેન્દ્રનગર બસ સ્ટેશન ખાતે 'સિગ્નેચર કેમ્પેઇન' દ્વારા જાગૃતિ ફેલાવાઈ

સુરેન્દ્રનગર: દર વર્ષની જેમ આ વર્ષે પણ વિશ્વ એડ્સ દિવસ (World AIDS Day) નિમિત્તે મહાત્મા ગાંધી સ્મારક હોસ્પિટલ (ગાંધી હોસ્પિટલ) દ્વારા જનજાગૃતિ કાર્યક્રમનું આયોજન કરવામાં આવ્યું હતું. હોસ્પિટલના આઈસીટીસી (ICTC) સેન્ટરના સહયોગથી સુરેન્દ્રનગર બસ સ્ટેશન ખાતે એક વિશેષ જાગૃતિ અભિયાન હાથ ધરવામાં આવ્યું હતું, જેનો મુખ્ય ઉદ્દેશ્ય સામાન્ય જનતામાં HIV/AIDS અંગેની સચોટ માહિતી પહોંચાડવાનો અને જાગૃતિ વધારવાનો હતો.

આ અભિયાન અંતર્ગત મુખ્યત્વે 'સિગ્નેચર કેમ્પેઇન'નું આયોજન કરવામાં આવ્યું હતું, જેમાં બસ સ્ટેશન પરના મુસાફરો અને સ્થાનિકોએ ઉત્સાહભેર ભાગ લઈને પોતાના હસ્તાક્ષર દ્વારા જાગૃતિના સંકલ્પને ટેકો આપ્યો હતો. ગાંધી હોસ્પિટલના આઈસીટીસી કાઉન્સિલર ભાવનાબેન એસ. પરમાર અને S.T.I. કાઉન્સેલર હસમુખભાઈ ડોડીયા દ્વારા આઈ.ઇ.સી (માહિતી, શિક્ષણ અને સંચાર) પ્રવૃત્તિઓ મારફતે લોકોને HIV/AIDSના નિવારણ, લક્ષણો અને સમયસર સારવારના મહત્વ અંગેનું વિગતવાર માર્ગદર્શન પૂરું પાડવામાં આવ્યું હતું.

કાર્યક્રમ દરમિયાન, કાઉન્સેલરોએ ખાસ ભાર મૂક્યો હતો કે HIV સંક્રમિત વ્યક્તિઓ પ્રત્યે ભેદભાવ રાખવો ન જોઈએ અને વહેલી તપાસ (Testing) દ્વારા રોગનું નિદાન થવું ખૂબ જ જરૂરી છે, જેથી યોગ્ય સારવાર સમયસર શરૂ કરી શકાય અને સંક્રમણનો ફેલાવો અટકાવી શકાય.

આ સમગ્ર જનજાગૃતિ પ્રોગ્રામને સફળ બનાવવા માટે સીડીએચઓ ડૉ. બી.જી. ગોહિલ સાહેબ, સીડીએમઓ ડૉ. ચેતન્ય પરમાર સાહેબ અને ડૉ. નિલેશ ખાંટ સાહેબનું યોગ્ય માર્ગદર્શન પ્રાપ્ત થયું હતું. કાર્યક્રમને સફળ બનાવવા માટે બસ સ્ટેશનના ડેપો મેનેજર સાહેબશ્રી તેમજ સંદીપસિંહ રાણા સહિતની તેમની ટીમે ભારે જહેમત ઉઠાવીને સંપૂર્ણ સહકાર આપ્યો હતો, જેના કારણે જાહેર જનતા સુધી આ મહત્વપૂર્ણ સ્વાસ્થ્ય સંદેશ પહોંચાડવામાં સફળતા મળી હતી.

તસવીર અહેવાલ. ડૉ. મનોજ પંડ્યા