સુરેન્દ્રનગર એન.ટી.એમ. હાઇસ્કુલ ખાતે વર્ગ-૩ અને ૪ ના કર્મચારીઓ માટે ત્રિ-દિવસીય ‘કર્મયોગી મહાઅભિયાન’ તાલીમ યોજાઈ

સુરેન્દ્રનગર : રાજ્ય સરકારના વહીવટી તંત્રને વધુ ગતિશીલ, પારદર્શક અને જનહિતલક્ષી બનાવવાના ઉમદા હેતુ સાથે સુરેન્દ્રનગર જિલ્લામાં એક મહત્વપૂર્ણ તાલીમ કાર્યક્રમનું આયોજન કરવામાં આવ્યું હતું. નાયબ મહાનિર્દેશકની કચેરી (અમદાવાદ) તથા કલેક્ટર અને જિલ્લા મેજિસ્ટ્રેટની કચેરી, સુરેન્દ્રનગરના સંયુક્ત ઉપક્રમે શહેરની એન.ટી.એમ. હાઇસ્કુલ ખાતે ત્રિ-દિવસીય ‘કર્મયોગી મહાઅભિયાન’ તાલીમ શિબિર નું આયોજન કરવામાં આવ્યું છે. જેમાં પ્રથમ દિવસની શિબિર સંપન્ન થઈ હતી.

આ તાલીમ ખાસ કરીને વહીવટી તંત્રના પાયાના સ્તંભ સમાન વર્ગ-૩ અને વર્ગ-૪ ના કર્મચારીઓ માટે આયોજિત કરવામાં આવી હતી. આ અભિયાનનો મુખ્ય ઉદ્દેશ્ય કર્મચારીઓમાં કાર્યક્ષમતા વધારવી (Capacity Building) અને નાગરિકો પ્રત્યે સેવાનો સંવેદનશીલ અભિગમ (Citizen-Centric Approach) વિકસાવવાનો હતો. સરકારી કચેરીઓમાં આવતા સામાન્ય જનતાના પ્રશ્નોને વધુ સારી રીતે સમજી, તેનું ત્વરિત નિરાકરણ લાવવાની કળા વિશે કર્મચારીઓને ઊંડાણપૂર્વક માર્ગદર્શન આપવામાં આવ્યું હતું.

આ તાલીમ શિબિરને સફળ અને પરિણામલક્ષી બનાવવા માટે રાજ્ય કક્ષાના અને સ્થાનિક તજજ્ઞોએ મહત્વની ભૂમિકા ભજવી હતી. આ અભિયાનમાં પ્રિયંકકુમાર કોષ્ટી, મુકેશભાઈ બદ્રેશિયા, પ્રવીણભાઈ વેગડા જેવા નિષ્ણાતોએ મુખ્ય વક્તા અને ટ્રેનર તરીકે સેવાઓ આપી હતી. આ તજજ્ઞોએ તાલીમ દરમિયાન વિવિધ પ્રવૃત્તિઓ, કેસ સ્ટડીઝ અને પ્રાયોગિક ઉદાહરણો દ્વારા કર્મચારીઓને ટીમ વર્ક, સમય પાલન અને નૈતિકતાના પાઠ ભણાવ્યા હતા. તાલીમને સફળ બનાવવા માટે આ નિષ્ણાતોની ટીમે ભારે જહેમત ઉઠાવી હતી.

ત્રણ દિવસીય આ સઘન તાલીમના અંતે, સહભાગી કર્મચારીઓએ પ્રતિભાવ આપતા જણાવ્યું હતું કે, આ પ્રકારના આયોજનથી તેમની કામ કરવાની પદ્ધતિમાં હકારાત્મક ફેરફાર આવશે. જિલ્લા વહીવટી તંત્ર દ્વારા કરવામાં આવેલા આ પ્રયાસનો સીધો લાભ સુરેન્દ્રનગર જિલ્લાના નાગરિકોને મળશે, જેથી સરકારી સેવાઓ વધુ સુલભ બનશે.