સુરેન્દ્રનગર: એજ્યુકેશન સોસાયટી સંચાલિત શ્રી કિરચંદભાઈ કોઠારી મિડલ સ્કૂલ તથા ફૂલચંદભાઈ શાહ કુમાર મંદિર ખાતે આજે રાષ્ટ્રીય યુવા દિવસ નિમિત્તે સ્વામી વિવેકાનંદ જન્મ જયંતીની ભવ્ય ઉજવણી કરવામાં આવી હતી. શાળાના પટાંગણમાં આયોજિત આ કાર્યક્રમમાં વિદ્યાર્થીઓએ ઉત્સાહપૂર્વક ભાગ લઈ સ્વામીજીના જીવન અને સંદેશને જીવંત કર્યો હતો.
કાર્યક્રમની શરૂઆતમાં ધોરણ ૫ ના વિદ્યાર્થીઓએ સ્વામી વિવેકાનંદના જીવન અને તેમના વિચારો પર આધારિત સુંદર ચાર્ટ પ્રદર્શન રજૂ કર્યું હતું. બાળકોએ ચાર્ટ દ્વારા સ્વામીજીના બાળપણથી લઈને શિકાગો ધર્મ પરિષદ સુધીની યાત્રાને સમજાવી હતી.
ત્યારબાદ, વિદ્યાર્થીઓ દ્વારા સ્વામી વિવેકાનંદના પ્રેરણાદાયી જીવન પ્રસંગો પર આધારિત નાટકો પ્રસ્તુત કરવામાં આવ્યા હતા. આ નાટકો દ્વારા 'ઉઠો, જાગો અને ધ્યેય પ્રાપ્તિ સુધી મંડ્યા રહો' ના મંત્રને સાર્થક કરતા પ્રસંગો રજૂ કરી ઉપસ્થિત સૌને મંત્રમુગ્ધ કર્યા હતા.
કાર્યક્રમના અંતિમ તબક્કે શાળાના આચાર્યએ વિદ્યાર્થીઓ સાથે સ્વામી વિવેકાનંદના જીવન વિશે પ્રશ્નોત્તરી કરી હતી. તેમણે સ્વામીજીની એકાગ્રતા, દેશભક્તિ અને યુવાનો પ્રત્યેના તેમના દ્રષ્ટિકોણ વિશે ઊંડાણપૂર્વક માહિતી આપી હતી. આચાર્યએ જણાવ્યું હતું કે, "આજના ટેકનોલોજીના યુગમાં પણ સ્વામીજીના વિચારો એટલા જ પ્રસ્તુત છે અને દરેક વિદ્યાર્થીએ તેમના જીવનમાંથી શિસ્ત અને સંકલ્પશક્તિના પાઠ શીખવા જોઈએ."
આ સમગ્ર કાર્યક્રમ દ્વારા શાળાના વાતાવરણમાં એક નવી ચેતના અને દેશભક્તિનો સંચાર થયો હતો. તેમજ શાળાના શિક્ષકગણ અને ટ્રસ્ટીઓએ બાળકોની આ સુંદર પ્રસ્તુતિને બિરદાવી હતી.
0 Comments